ဟိုတယ်၏ Room Service ဝန်ထမ်း မင်းသူရသည် မိခင်ကျန်းမာရေး အခြေအနေကြောင့် အသုံးစရိတ် လျော့ချရန်အတွက် ဈေးနည်းနည်းဖြင့် နေထိုင်နိုင်မည့် အဆောင်ကို လိုက်ရှာနေသူ တစ်ယောက်ဖြစ်သည်။ တစ်ရက်တွင် လုပ်ဖော်ကိုင်ဖက်တစ်ယောက်၏ အဆက်အသွယ်ဖြင့် မြို့ပြင်ဘက်ရှိ ပုရိသအဆောင်သို့ လာရောက်စုံစမ်းခဲ့ရာ သင့်တင့်သည့်ဈေးနှုန်းဖြင့်နေနိုင်ကာ နေရာထိုင်ခင်း ကျယ်ကျယ်ဝန်းဝန်း ရရှိသဖြင့် ကျေနပ်သော်လည်း ဟောင်းနွမ်းသည့်အတွက်ကြောင့် မနှစ်မြို့ခဲ့ပေ။ သို့သော် အဆောင်ပိုင်ရှင်၏ ဖော်ရွေစွာ ဆက်ဆံသည့် အပြုအမူများကြောင့် နေထိုင်ဖို့ ဆုံးဖြတ်ခဲ့သည် ။ အဆောင်ပိုင်ရှင် ဒေါ်သီရိရှိန်သည် သင်္ဘောသား ကတော်တစ်ယောက်ဖြစ်ကာ ဖောက်ပြန်မှုတစ်ခုကြောင့် ယောက်ျားဖြစ်သူပစ်သွားသည်ဟု ပတ်ဝန်းကျင်က သိထားသည်။ ယောက်ျားဖြစ်သူ ပစ်သွားသည့်နောက်ပိုင်း အထည်ကြီးပျက်ဘဝဖြင့် ဟောင်းနွမ်းနေသည့် သူ၏ အိမ်ကို မပြင်မဆင်ဘဲ အိမ်၏အနည်းငယ်ကောင်းသည့် အခန်းများအား အမျိုးသားဆောင်ဖွင့်ထားခြင်းနှင့် တရားမဝင် ငွေတိုးချေးစားသည့်အလုပ်ကို လုပ်ကိုင်နေသူဖြစ်သည်။ အထီးကျန်နေသည့် သူ့ဘဝအား အဆောင်တွင်းရှိ ယောကျာ်းလေးများကို အဖော်ပြုရင်း ဖြတ်သန်းနေသူလည်း ဖြစ်သည်။ ပုရိသအဆောင်တွင် လူမိုက်ညီအစ်ကိုများ ဖြစ်ကြသည့် နဂါးကြီးနှင့် နဂါးလေး… စိတ်ဆတ်လွန်းကာ ရှူးရှူးဒိုင်းဒိုင်းလုပ်တတ်သည့် နဂါးကြီးတို့၏နောက်လိုက် ပေါ်စစ်… ရပ်ကွက်ဈေးတွင် ဈေးသူဈေးသားများ၏ ခိုင်းဖက်ဘဝဖြင့် တောက်တိုမယ်ရလုပ်ကာ အသက်မွေးနေသည့် ရူးသွပ်သွပ်ပေါတောတော ဆွံ့အနားမကြားသည့် အာကြီး… ရပ်တကာလှည့်ကာ တေးသရုပ်ဖော်ဖြင့်ဖျော်ဖြေရင်း မီးဖိုချောင်သုံး အသေးအဖွဲပစ္စည်းများကို စက်ဘီးဖြင့်တင်ရောင်းပြီး ဝမ်းစာရှာနေသည့် ဂျိုကာတို့ နေထိုင်ကြသည်။ သည်းထိတ်ရင်ဖို ကြည့်ရှုရမယ့် ပန်းထောင်ချောက် မြန်မာရုပ်သံဇာတ်လမ်းတွဲကို စနေ၊တနင်္ဂနွေနေ့ ည(၈:၀၀) နာရီအချိန် MRTV-4 ရုပ်သံလိုင်းမှာ ကြည့်ရှုနိုင်ပါသည်။
